Cakaj-Le Drian: Franca vlerësime për reformat e ndërmarra nga Shqipëria
Franca vlerëson reformat e ndërmarra nga Shqipëria të cilat mundësojnë avancimin e saj drejt BE-së
Ministri në Detyrë për Europën dhe Punët e Jashtme, Gent Cakaj ka zhvilluar një takim me Ministrin e Punëve të Jashtme të Francës, Jean Yves Le Drian gjatë Ministerialit të Ministrave të Jashtëm të NATO-s.
Gjatë këtij takimi Ministri në Detyrë Cakaj e njohu Ministrin Le Drian me progresin e reformave në pesë prioritetet në Shqipëri dhe me pritshmëritë tona për marrjen e rekomandimit pozitiv nga Komisionit në maj dhe vendimit të Këshillit Europian për hapjen e negociatave në qershor.
Ministri në Detyrë, Cakaj shprehu vendosmërinë e autoriteteve tona për të vijuar me ritëm të shpejtë, ngritjen dhe konsolidimin e institucioneve më të larta të drejtësisë, si dhe reformat e tjera të domosdoshme për shtetin e së drejtës. Ai renditi si arritje me impakt tepër pozitiv hapat e ndërmarra nga Qeveria shqiptare për të luftuar korrupsionin dhe krimin e organizuar.
Nga ana e tij Ministri i Jashtëm francez Le Drian theksoi se reforma në fushën e drejtësisë është një ndërmarrje tepër pozitive ku Shqipëria ka bërë një avancim të kënaqshëm që do të ndikojë më së miri në krijimin e një strukture të pavarur e profesionale të Drejtësisë si dhe për avancimin e Shqipërisë në rrugën e hapjes së negociatave.
Ministri francez vlerësoi gjithashtu masat e marra nga Shqipëria për zvogëlimin e numrit të azil kërkuesve shqiptarë në Francë, numër i cili është ulur në mënyrë të ndjeshme nga 2017 në 2018. Ai vlerësoi entuziazmin dhe seriozitetin e autoriteteve tona për të vijuar me të njëjtin ritëm, transformimin e sistemit të drejtësisë.
Ministrat ndanë gjithashtu mendimin për situatën në Lindjen e mesme dhe diskutuan edhe për angazhimet respektive, në kuadër të Aleancës së Atlantikut të Veriut ashtu edhe në kontributin e dhënë për ndërtim kapacitetesh në vendet partnere përreth hapësirës Euro-Atlantike.
Fraksion.com
