Ngjela: Fjalimi i Rudinës, mendimi i Zëvendës/ndihmës Sekretarit të Shtetit amerikan

Avokati Spartak Ngjela ka dalë në krah të Rudina Hajdarit, duke theksuar se fjalimi i saj i djeshëm në parlament është mendimi që do shprehë në Tiranë më 9 prill, zv/ndihmës Sekretari i amerikan i Shtetit.

Postimi i Ngjelës:

Fjalimi i Rudina Hajdarit në Parlament, pritet të jetë edhe mendimi i Zëvendës/ ndihmës Sekretarit të Shtetit amerikan që do të vijë në Tiranë në datë 9 prill.

Duhet të thuhet qartë nga politika amerikane që grupi i Sali Berishës nuk ka më punë me Parlamentin dhe pengesa që i bën Rama reformës në drejtësi, po ashtu, duhet denoncuar hapur përpara shqiptarëve.

Rama bërtet kot, se e di që pa Berishën është një i humbur. Por sigurisht që këtë e di tani edhe politika amerikane. Sot u pa në Parlament që këtë e di ndërkohë dhe e njeh shumë mirë si fenomen edhe deputetja Rudina Hajdari. Ajo e tha hapur në fjalimin e saj, kur u shpreh se: “sistemi elektoral Berisha-Rama është marrëveshja antidemokratike e uzurpimit me radhe të pushtetit nga Berisha dhe Rama”.

Kjo është në fakt marrëveshja që pritet të godasë edhe zyrtari i lartë amerikan në datën 9 prill. A do të ndodhë? Të shohim.

Sigurisht gjithçka do të trajtohet së pari në gjuhë diplomatike të cilën Rama është mirë ta kuptojë.

Në një kohë që Berisha është vetëasgjesuar politikisht, çdo të bëjë Rama?
Nuk ka rrugë tjetër: ose do të nënshtrohet drejt reformës, ose do të luftohet politikisht me fakte konkrete nga Uashingtoni.

Kjo është rruga e politikës amerikane në favor të Shqipërisë dhe shqiptarëve.
Dyshja Rama-Berisha nuk është me shqiptarët dhe nuk punon për ta, por për korrupsionin e tyre vetjak që ka ardhur si pasojë e uzurpimit të pushtetit.

Gjithsesi, asgjë nuk do të bëjnë dot. Reforma shqiptare dhe uniteti gjithëshqiptar në Ballkanin Perëndimor është tanimë një proces i pandalshëm dhe triumfues.

Fraksion.com