Hajdari, PD-PS-LSI: Komunikoni me kode dhe takoheni jashtë Shqipërisë

Deputetja, Rudina Hajdari, i kërkoi mazhorancës që të vendosë për komisionin e reformës zgjedhore pas formimit të grupeve parlamentare. Duke u distancuar si nga mazhoranca ashtu dhe ish-opozita në Kuvend, Hajdari i akuzoi palët për komunikime me kode dhe takime jashtë shtetit.

“Përfaqësuesi i PD nuk është këtu, nuk është legjitim. Këtu ka deputetë të rinj. Prisni që të formohen grupet parlamentare dhe ne do të bëjmë kërkesën tonë sipas nenit këtu me 7 deputetë  që të ngremë një komision të posaçëm dhe të shqyrtojmë në konferencën e kryetarëve sipas propozimeve tona se çfarë do të ndodhë në këtë Komision”, u shpreh Hajdari.

Më tej ajo shtoi se e kupton se ata duan që ta bëjnë këtë shpejt e shpejt por kjo sipas saj nuk bëhet në këtë lloj mënyrë.

“Flisni me opozitën jashtë me kode. Këtej flisni se nuk doni këtë, këtej flisni se ata e kanë fajin. Ju lutem shumë, unë ua kuptoj shumë mirë kodet me njëri-tjetrin dhe dhe e di shumë mirë që bëni takime dhe jashtë Shqipërisë dhe diskutoni se çfarë do të ndodhë, si do të ndodhë dhe kujt do ta t’ja plotësoni qejfet. Por unë këtu nuk kam ardhur të bëhem fasada e asnjerit, e juaja dhe as e ish-opozitës. Unë kam ardhur këtu me parime dhe do të vazhdoj të luftoj për parimet e mia”, deklaroi deputja demokrate.

Hajdari tha se ajo do një sistem tjetër, ndërsa kërkoi t’i hapin rrugë qytetarëve të zgjedhin përfaqësuesit e tyre. “Të heqim përfaqësues këtu që nuk janë të denjë të përfaqësojnë Shqipërinë, që kanë ardhur me lista të mbyllura, me rekorde kriminale, të paedukuar, pa shkollim të lartë, pa kredite dhe merita për të qenë këtu.Të vimë këtu dhe të flasim për një sistem zgjedhor që e meriton Shqipëria dhe jo kryetarët e juaj që të mbajnë pushtetin ekzekutiv në këtë parlament. Boll më! Jemi lodhur”, përfundoi fjalën rudina Hajdari!

Fraksion.com