Rama: Lyerja me të zezë e ministrisë u bë për euro-kadrinjtë
Në fjalën e mbajtur në Parlament pas përfundimit të protestës së opozitës, kryeministri Edi Rama deklaroi se lyerja me të zezë e Ministrisë së Brendshme u bë në mënyrë që të shpërndahen pamjet në mediat e huaja.
“Ata që sot për turpin e tyre hodhën bojë të zezë në MB, e hodhën për ta filmuar dhe eksportuar, se nuk eksportojnë nëpër botë imazhet jombresëlënëse të një tufe të punonjësve të bashkive të Shkodrës, Lezhës, Kamzës, bashkë me Dashon e Lazaratit që mblidhen për të kënduar himnin kombëtar, pasi kanë ardhur vërdallë rrugëve por për të treguar një Shqipëri që e nxinë. Pra donin një produkt më tërheqës që nxin Shqipërinë dhe boja ishte gjetja”, tha Rama.
Shefi i qeverisë nuk la pa sulmuar as median për mënyrën si pasqyron lajmet, madje sulmoi gazetarët e BE që pasqyrojnë protestën duke i quajtur Eurokadrinjë.
“S’janë të paktë eurokadrinjtë që ngjajnë me kadrinjtë lokalë që kemi ne dhe ata janë të pafajshëm se pak ose aspak dinë mbi Shqipërinë dhe duhet të ushqejnë opinionin publik me lajme sensacionale, që hidhet bojë mbi një institucion në protestë”, u shpreh ai.
Kreu i qeverisë shtoi se “Shqipëria sot është një vend shumë më i sigurtë se 5 vite më parë”.
Më herët, kryeministri Edi Rama reagoi përmes një postimi në InstaStory lidhur me protestën e sotme të opozitës. Ndërsa ndan një video të momentit kur protestuesit spërtakën me bojë të zezë Ministrinë e Brendshme, Rama ironizon opozitën ndërsa shkruan se ky është produkti më i ri për nxirjen e Shqipërisë.
“Gati për eksport nëpër botë produkti më i ri për nxirjen e Shqipërisë”, shkroi Rama.
Fraksion.com
