Lobimi në SHBA; Lulzim Basha dëshmon në Prokurorinë e Tiranës
Kryedemokrati Lulzim Basha ka shkuar sot në Prokurorinë e Tiranës.
Organi i akuzës thirri sot kryedemokratin si person që mendohet se ka dijeni në lidhje me lobimin e selisë blu në Shtetet e Bashkuara të Amerikës dhe pretendimet e ngritura për ndihmën ruse në zgjedhjet e përgjithshme të 2017.
Prokuroria e ka kërkuar për të dëshmuar si person që ka dijeni për rrethanat e ngjarjes.
Ndërkohë që herën e parë, Basha refuzoi thirrjen e prokurorisë pas ardhjes së letërporosive nga ShBA.
Prokuroria nisi verifikimet për kontratën e lobimit të PD me disa kompani amerikane në nëntor të vitit 2017.
Objekt i këtij verifikimi është sqarimi i burimit të financimit për këto kontrata dhe skanimi i tyre për të parë nëse transaksionet kanë qenë të rregullta ligjërisht.
Kontrata e parë e lobimit ishte ajo mes PD dhe ‘Stonington Strategies’ me vlerë 25 mijë USD në muaj. Afati i kontratës ishte tre mujor dhe qëllimi i saj ishte ‘projektimi dhe implementimi’ i fushatës së PD.
Qëllimi i saj ishte promovimi i qëllimeve të PD në media dhe pranë figurave politike në SHBA.
Më pas PD bëri edhe një pagesë shtesë prej 500 mijë USD për sigurimin e disa takimeve ose pjesmarrje në evente në Uashington D.C.
Pas Bashës sot në Prokurori ka mbërritur edhe ish-deputeti Gazmend Bardhi. Ai bashkë me Ilir Dervishin dhe Arben Ristanin që po ashtu pritet të thirren në Prokurori do të dëshmojnë si persona që kanë diejeni për ngjarjen.
Fraksion.com
