Një tjetër kandidat i PD kërkon të marrë mandatin në KQZ
“Opozita e re” pritet të shtohet sot me 6 deputetë të rinj, të cilët janë konsideruar “tradhtarë” nga Monika Kryemadhi dhe Lulzim Basha pasi kanë braktisur kauzën e përbashkët për djegie mandatesh.
Zëvendësuesit që do të plotësojnë vakancat pas vendimit ekstrem të opozitës janë kryesisht nga partitë aleate me PD, si “Balli Kombëtar”, apo Partia Konservatore.
Por, paraditen e sotme një “tërmet” të vërtetë ka shkaktuar në selinë blu, lajmi se Alban Zeneli, ish-deputet i Kukësit në legjislaturën 2013-2017, ka pranuar të futet sërish në Parlament.
Zeneli ka dorëzuar sot në KQZ formularin e dekriminalizimit dhe për rrjedhojë kërkon marrjen e mandatit në siglën e Partisë Demokratike, të cilën e ka përfaqësuar për 4 vite në Parlament.
Ai nuk doli fitues në zgjedhjet e 2017-ës, ndërsa njihet edhe si mik i afërt i ish-ministrit të Brendshëm, Flamur Noka. Si për ironi të fatit, Zeneli do të zëvendësojë në Kukës, pikërisht ish-deputetin Noka.
