Kandidati i PD-së dorëzon formularin e dekriminalizmit; Kërkon mandatin e deputetit në KQZ

Lefter Maliqi, ish-kandidat i Partisë Demokratike në Qarkun e Beratit, ka dorëzuar të hënën në Komisionin Qendror të Zgjedhjeve (KQZ) formularin e dekriminalizimit.

Për rrjedhojë, Lefter Maliqi pritet të përfitojë mandatin e deputetit.

Maliqi kandidoi me Partinë Demokratike në Berat, ndërsa një vit më parë u emërua nga mazhoranca si zv.Drejtor i Përgjithshëm i Burgjeve.

Edhe pse Maliqi nuk e ka pranuar më parë se do ta marrë mandatin, me vendimin e sotëm ai vijon kundërshtitë ndaj lidershipit të Bashës, shkruan JavaNews

Gjatë fushatës së vitit 2017, ai deklaroi mbështetjen për Partinë Socialiste, pavarësisht se figuronte i treti në listën e PD-së.

Maliqi bëhet kështu i pari kandidat nga selia blu që kërkon mandatin e deputetit, duke zëvendësuar kështu Astrit Veliajn. Ky i fundit mori mandatin e Eduard Halimit pas dorëheqjes së papritur.

Më herët Myslim Murrizi dhe Rudina Hajdari nuk pranuan dorëzimin e mandateve, ndërsa nga radhët e LSI janë sëpaku katër emra që nuk i binden vendimit të partisë në fjalë.

Lefter Maliqi ka qenë edhe më parë deputet i Partisë Demokratike, në Legjislaturën VII të Kuvendit të Shqipërisë. Ai ka mbaruar Akademinë e Rendit dhe të Mbrojtjes. Maliqi ka qënë shef policie në disa qytete të Shqipërisë si dhe pedagog në Akademi.

Fraksion.com