Vendet e lira në Kuvend, KQZ: Kandidatët në lista, 10 ditë afat
KQZ ka bërë të ditur se për të plotësuar vakancat e 57 deputetëve të dorëhequr, kandidatët në listën shumë emërore kanë afat 10 ditë për të plotësuar formularin e vetëdeklarimit.
Në një deklaratë të shkurtër për mediet, zëdhënësja e institucionit më të lartë zgjedhor në vend njoftoi se procedurat do të vijojnë sipas ligjit, ndërsa kandidatët në listat shumemërore partiake kanë 10 ditë kohë të plotësojnë formularin e vetëdeklarimit.
“Në KQZ ka mbërritur kërkesa e Kuvendit të Shqipërisë për plotësimin e vakancave për 57 deputetë të dorëhequr. Ligji i kërkon KQZ-së që të kontaktojë kandidatët e listave respektive sipas radhës, dhe t’u kërkojë atyre plotësimin e formularit të vetëdeklarimit, pa të cilin nuk mund të marrin vërtetimin e zgjedhjes. Kandidatët e listave shumemërore kanë 10 ditë kohë afat për dorëzimin e formularit të vetëdeklarimit. Zëvendësimet e vakancave të krijuara do të kalojnë më pas në mbledhjet publike të KQZ-së”, tha Drilona Hoxhaj, zëdhënëse e KQZ-së.
Fraksion.com
