Kuvendi, seanca plenare; Paloka, mesazh urgjence strukturave të PD

26 Shkurt, 2019 admin

Konferenca e Kryetarëve të grupeve parlamentare, ka vendosur në mbledhjen e sotme që në orën 17:00 të zhvillohet seance plenare.

Ndërkohë opozita nga ana e saj ka njoftuar planet për protesta të përjavshme, me ditën e caktuar çdo të enjte kur edhe zhvillohen seancat plenare të Kuvendit të Shqipërisë. Ajo ka theksuar se do të protestojë përpara legjislativit deri, siç thotë ajo, në rrëzimin e qeverisë së kryeministrit Edi Rama.

Por mesa duket njoftimi sot nga drejtuesit e Kuvendit për zhvendosjen e ditës të mbajtjes të seancës i ka kapur në befasi.

Dhe menjëherë pas njoftimit për mbledhjen e seancës plenare ka reaguar kryetari i grupit të dorëhequr parlamentar të Partisë Demokratike, Edi Paloka, i cili përmes rrjeteve sociale e ka quajtur mbledhje në ilegalitet të një Kuvendi ilegal.

“Pasi e rrethuan me tela me gjemba dhe salduan dyert hyrëse, tani kanë filluar ta mbledhin dhe në ilegalitet. Seancën e së enjtes po kërkojnë ta mbledhin fshehtas sot në orën 17:00. Sa mendoni se do zgjasni kështu?! Tik-tak…”, shkruan Paloka.

Ndërkohë, Partia Demokratike ka shpërndarë një mesazh me urgjencë për strukturat e saj, për t’u organizuar për një protestë përpara Parlamentit në orën 16:30.

“Sot në orën 17:00 ka seancë parlamentare. Merrni masa për prani maksimale të strukturës në orën 16:30 para Parlamentit”, shkruhet në mesazhin drejtuar strukturave.

Fraksion.com

You May Also Like