Shekerinska – Xhaçka: Maqedonia në NATO, nënkupton rajon më të sigurt

25 Shkurt, 2019 admin

Veprat dëshmuan se Maqedonia e Veriut dhe Shqipëria janë miq të vërtetë. Kështu deklaroi ministrja e Mbrojtjes, Radmilla Shekerinska, pas takimit me homologen e saj nga Shqipëria, Olta Xhaçka.

Shekerinska tha se miqësinë dhe respektin e vërtetë ndaj vendit tonë, Shqipëria e dëshmoi me mbështetjen e vazhdueshme për anëtarësimin në NATO edhe ratifikimin jashtëzakonisht të shpejtë të Protokollit për anëtarësim, pas Greqisë dhe Sllovenisë. Ajo nënvizoi edhe aktivitetet ku dy vendet do të bashkëpunojnë si aleate.

Pjesëtarët e Armatës sonë do të jenë pjesë e ushtrimit multinacional që do të mbahet këtë vit tek fqinjët tonë, ndërsa këtë vit po ashtu me arsye dhe argumente plotësuese do të marrim pjesë në iniciativën Bashkëpunimi i Adriatikut – SHBA të cilën do ta kryesojë pikërisht Republika e Shqipërisë – deklaroi Radmilla Shekerinska, Ministre e Mbrojtjes.

Zëvendëskryeministrja Radmilla Shekerinska, uroi Ministren Xhaçka për shënimin e 10 vjetorit të anëtarësimit të Shqipërisë në NATO. Ministrja e Mbrojtjes së Shqipërisë, Olta Xhaçka, deklaroi se ndjehet mirë që faktori politik dhe qytetar shqiptar në Maqedoni, ka luajtur rol konstruktiv për arritjet e fundit të vendit. Ajo shtoi se me Marrëveshjen e Prespës dhe Ligjin për gjuhët, u dëshmua lidership i guximshëm dhe vizionar.

Nga sot i gjithë rajoni do të jetë më i sigurt, me më shumë stabilitet dhe unë jam e bindur që të gjithë së bashku do të mund të shohim drejtë të ardhshmes me më shumë optimizëm. Shqipëria e ka parë gjithmonë stabilitetin dhe sigurinë e Maqedonisë së Veriut si një nga kushtet kryesore për të garantuar sigurinë e rajonit – u shpreh Olta Xhaçka, ministre e mbrojtjes e Republikës së Shqipërisë.

Gjatë vizitës zyrtare në vend, ministra e mbrojtjes Olta Xhaçka, ka zhvilluar takim edhe me kryeministrin Zoran Zaev dhe kryetarin e Kuvendit Talat Xhaferri./Alsat

Fraksion.com

You May Also Like