A do ta destabilizojnë dot Shqipërinë e Kosovën?

Nga Spartak Ngjela

A do ta destabilizojnë dot Shqipërinë dhe Kosovën Rama dhe Thaçi?
E kanë të pamundur.
Po Berisha a mund ta destabilizojë Shqipërinë më 16 shkurt të këtij viti?

l.
Destabilizimin e Ballkanit e kërkon me ngulm Putini. Me të janë të korruptuarit e mëdhenj të Shqipërisë që bëjnë sikur zihen me njëri-tjetrin si rrugaçët me fjalë të ndyra.
Të tre bashkë e kanë shpresën te lobi serborus në Uashington, dhe te ndërhyrja e Rusisë në Shqipëri me ata që ajo mendon të sjellë në Shqipëri si në kohën e Çadrës, por dhe me agjenturën ruse në Shqipëri që nuk është e vogël.
Por, lobi ruso-serb në Uashington është nën hetim, ky është fakt. Kështu që është i neutralizuar. Prandaj gjithçka pritet nga aktorët shqiptarë.
Aktorët shqiptarë, Berisha, Rama, Meta, tani që janë të kapur të tre me korrupsion, e kanë shpresën te Beogradi por edhe Beogradi edhe Moska te këta e ka shpresën.
Po politika amerikane?
Ajo deri tani është konstante. Edhe Jhon Bolton, kundërshtari i deklaruar i Kosovës, nga frika e hetimit, tani është tërhequr dhe e detyroi edhe Thaçin që të tërhiqet për Mitrovicën, duke deklaruar se Mitrovica dhe Ujmani, nuk jepen.

Por, faktori kryesor i patriotizmit shqiptar tani është kryeministri i Kosovës Ramush Haradinaj. Qëndresa e tij do ta mundë përfundimisht politikën ruse në Tiranë dhe në Ballkani Perëndimor.
Putini do destabilizimin e Ballkanit. Ky tani është fakt. Kurse kançelarja gjermane, Merkel, është në avangardën anti Putin, dhe bravo i qoftë, sepse ky është një qëndrim historik.

Kurse politika amerikane duhet të ngrihet në nivelin e duhur, edhe pse presidenti amerikan është me probleme. Ka pasur një dyshim këto ditë në lidhje me angazhimin amerikan kundrejt çështjes së Kosovës, por një gjë është e sigurt në këtë situatë se, të gjithë ata që kërkojnë dhënien e Mitrovicës Serbisë, janë me politikën ruse dhe kundër interesit shqiptar dhe interesit amerikan në Ballkanin Perëndimor.
Tërheqja e Thaçit që u deklarua kundër një mundësie për dhënien e territorit të Mitrovicës, tregon se gjithçka në Uashington po shkon drejt interesit shqiptaro-amerikan në Ballkanin Perëndimor.

ll.
Por e keqja shqiptar e sot është korrupsioni kryeministror Berisha-Rama.
Çfarë pritet të ndodhë me korruosionin kryeministror Berisha – Rama? Këta në fakt janë të falimentuar dhe pse i bashkon i njëjti hall: SPAK – u.

Rama me naivitet, para zgjedhjeve të vitit 2017, bleu asetet toksike të Berishës. Rama në fakt priti destabilizimin e Shqipërisë deri te Çadra e Saliut, por kur kjo ra, ky i trembur mendoi të shpëtonte gjendjen me bashkim, duke blerë asetet toksike korruptive të Berishës.
Që nga ajo kohë edhe ky për destabilizimin e Shqipërisë është dhe ndihmon në intoksikimin e situatës shoqërore në Shqipëri. Rama, duke kërkuar të shpëtonte Saliun e humbi edhe vetë fatin që mund ta shpëtonte nga ndëshkimi antikorrupsion.

A mund të shpëtojnë? Jo. Janë të dy të humbur dhe bëjnë luftë fallso me shpresë që ana e Saliut të mbushë në mënyrë agresive sheshet dhe bulevardin më 16 shkurt. Prandaj bëjnë sikur zihen.
Është për të qeshur. Nuk e arrijnë dot, edhe pse Rama ka vendosur në polici drejtorët e Berishës pikërisht për këtë arsye.
Por politika është forcë.

Politika amerikanë do të ushtrojë forcë ndaj të dyve. Kjo është e dukshme. Korrupsioni kryeministror shqiptar, me Zërin e Amerikës, kuptohet se tani është futur nën rrezen e shënjestrës amerikane. Dhe kryesori deri tani është Edi Rama.
Janë të humbur, të falimentuar dhe me aksione toksike që iu kanë mbetur në dorë si letra pa vlerë, dhe që nuk kanë më asnjë forcë në opinionin publik shqiptar.
Stabiliteti i Shqipërisë është interes amerikan. Kjo nuk diskutohet. Vërtet mendoni se Putuni ka mundësi të destabilizojë Shqipërinë dhe Kosovën me aksionet toksike të zhvlerësuara plotësisht të Ramës dhe Berishës?

Fraksion.com