Basha, në Lezhë: Të bashkohemi më 16 shkurt në Tiranë

Kreu i Partisë Demokratike, Lulzim Basha gjatë takimit me qytetarët e Lezhës ka ftuar ata në protestën e 16 shkurtit në Tiranë. Ai tha se të gjithë duhet të dalin në protestë për të dëshmuar se Edi Rama nuk është kryeministri i vendit, por hajduti i votave.

Sipas Bashës, çdo ditë mbyllin qepenat 50 biznese për shkak të taksave, ndërkohë që ekonominë e cilësoi në krizë totale, madje theksoi se papuënsia është rritur.

Duke premtuar se demokratët kanë një plan për të ndihmuar biznesin e vogël, ai veçoi faktin se biznesi me xhiro vjetore deri në 14 milionë lekë do të përjashtohet nga TVSH-ja.

Në fund, por jo më pak e rëndësishme për Bashën, kryeopozitari i ftoi qytetarët të bashkohen të gjithë më 16 shkurt në Tiranë, me thirrjen se ajo është dita kur populli do të marrë në duar fatin e tij.

“Vota e lirë është asgjësuar me kriminelë, Edi Rama është kapur në flagrancë duke vjedhur votën. Juve iu duhet një qeveri që të mendojë për njerëzit, që çmimi i energjisë të ulet me 30-40%, pasi fatura e energjisë është rritur për 100% të shqiptarëve”, tha ndër të tjera Basha.

Sipas Bashës, PD-ja dëshiron të vijë në pushtet me votë, por për këtë, populli duhet të prishë kontratën me këtë qeveri dhe t’i hapë rrugë një qeverie provizore që do të zhvillojë zgjedhje të lira dhe të ndershme.

“Rama nuk është kryeministër, por atje e kanë çuar Gjushi dhe Nicja. E kanë çuar Bajrët  e Shkodrës dhe Ndokajt në Lezhë”, shtoi Basha.

Fraksion.com