Balluku: Kontratat e HEC-eve në skaner

Ministrja e Energjisë dhe Infrastrukturës, Belinda Balluku në një tjetër dalje publike njoftoi skanimin e të gjitha kontratave operative të HEC-eve në vend. Ajo po ashtu deklaroi se do të ngrinë të gjitha kontratave jo operative deri në përfundim të procesit të skanimit.

“Jam informuar intensivisht gjatë këtyre ditëve të para në detyrë mbi situatën dhe ecurinë e kontratave koncesionare të Hidrocentraleve, të cilat janë 182 Kontrata që i korrespondojnë 440 HEC-e. Sot vetëm 96 hidrocentrale janë operative. Ato i përkasin 73 kontratave koncesionare dhe kjo përbën një arsye për një vëzhgim të detajuar të të gjithë kontratave ende jo operative, në funksion të një sërë konkluzionesh të nevojshme për të gjykuar strategjinë e këtij sektori, efikasitetin e politikës së ndjekur në vite për stimulimin e HEC-eve të vegjël, impaktin ekonomik dhe social të tyre, e me radhë. Në këto kushte, kur kemi shumë më shumë kontrata ende jo-operative, sesa operative, është koha të bëjmë një ndalesë dhe të gjykojmë për vazhdimësinë.

Kam vendosur fillimin e një procesi skanimi të dokumentacionit licensues të çdo subjekti të licensuar, e po ashtu dhe skanim fizik të çdo HEC-i dhe subjekti realizues.  Ky proces do të ndiqet nga një grup pune i udhëhequr nga Zëvendësministri Z. Bonati, i cili ka bërë një punë voluminoze dhe të vyer në sektorin e ujit”- tha ministrja e re.

Ministrja sqaroi se procesi do të bazohet në dy kritere, nëse kompanitë e licensuara i kanë përmbushur kushtet teknike dhe afatet kohore si dhe kriteri i përputhshmërisë me kërkesat mjedisore.
Balluku dha se gjatë kësaj kohe deri sa të kalojnë në skaner të gjitha kontratat do të pezullohen ato që janë jooperative.

“Procesi në fjalë do të bazohet në dy kritere, kriteri i përputhshmërisë ligjore dhe përmbushja e kushteve kontraktuale nga subjektet e licensuara, duke përfshirë këtu kushtet teknike dhe afatet kohore, si dhe kriteri i përputhshmërisë me kërkesat mjedisore. Ky institucion në pesë vitet e fundit ka bërë një disiplinim të madh të situatës së trashëguar, e cila ishte skandaloze, në kufijtë e kriminales, por jo vetëm e mira s’ka fund, edhe problemet e sektorit në këtë drejtim nuk janë sosur, por janë reale e shqetësuese. Prandaj ne, gjithashtu, do të skanojmë dhe vlerësojmë nëse kontratat ekzistuese janë në përputhje me kushtet mjedisore dhe standardet e kërkuara në zonat përkatëse. Kujtoj se konçesionarët kanë detyrim të jenë në përputhje të plotë me legjislacionin në fuqi përsa i përket mjedisit dhe kushteve mjedisore të vendosura në kontratë”,- sqaroi ajo.

Balluku e cilësoi të papranueshëm rastin e ndërtimit të HEC-it mbi kanionin e Holtës në Gramsh dhe tha se në bashkëpunim ministrin e Mjedisit, Blendi Klosi do të trajtohet në formën e një diskutimi me banorët. “Nga ana tjetër, kam vendosur ngrirjen e të gjithë kontratave jooperative deri në daljen e raportit të skanimit të tyre. Po ashtu, do të bashkërendojmë me  Ministrinë e Turizmit dhe Mjedisit për një qasje ligjore dhe administrative të integruar në mënyrë që të mos përsëriten më situata ligjërisht të paatakueshme, por faktikisht të papranueshme, siç është dhe rasti i fundit në Gramsh. Së bashku me Ministrin Klosi do ta kthejmë rastin e Gramshit në një platformë diskutimi të hapur me komunitetin dhe do të punojmë për përmirësimin e bazës ligjore e të procedurave. Por, dua ta them shumë qartë: vërtet HEC-ët e vegjël kontribuojnë në ekonomi, por dhe mund të dëmtojnë ekonomikisht shumë më tepër sesa kontributi i tyre, nëse për një HEC të vogël i bie vlera një pasurie të madhe natyrore. Ndaj, na duhet një ekuilibër perfekt mes zhvillimit ekonomik dhe mbrojtjes se pasurive tona natyrore, të cilat janë pasuria më e madhe që ne shqiptarët kemi”,- tha Balluku.

Me të marrë detyrën ministrja e re në krye të MiE, Balluku shkarkoi nga detyra Drejtorin i Autoritetit Shtetëror të Rrugëve (ARRSH), Afrim Qëndro, duke e zëvendësuar me ish-ministren e Mbrojtjes së Sipërmarrjes, Sonila Qato. Nga detyra u dorëhoq edhe kreu i OST Klodian Gradeci. Vendimet vijnë pas skandalit me kompaninë “DH Albania”e cila fitoi dy tendera me vlerë 30 milionë euro për Unazën e Re dhe për një linjë transmetimi mes Burrelit dhe Peshkopisë. Ajo po ashtu shkarkoi edhe drejtorin e Portit të Durrësit Afrim Baka. Në vend të tij është emëruar drejtor i Autoritetit Portual Durrës Genti Tare. Një tjetër vendim i marrë prej saj ishte edhe anulimi i koncesionit të aksit Thumanë-Kashar, patë e të cilit siç tha ministrja, do të përdoren për “Paktin për Universitetin”.

Fraksion.com