Gjermani: Arrestohet personi i dyshuar për vjedhjen e të dhënave
Policia ka arrestuar një person të dyshuar për vjedhjen dhe publikimin e të dhënave personale të shumë politikanëve dhe personave publik. Bëhet fjalë për një 20-vjeçar.
Nuk ka pasur bashkëpunëtorë
Mediat njoftojnë se personi i arrestuar nuk ka pasur ndonjë bashkëpunëtor por ka vepruar i vetëm. Gazeta “Spiegel Online” i referohet hetuesisë dhe pohon se nuk ka të dyshuar të tjerë. Thuhet se 20-vjeçari nuk ka pasur as lidhje me shërbimet e huaja sekrete.
Ditët e fundit janë publikuar të dhëna personale të rreth 1000 politikanëve, prominentëve, gazetarëve dhe personave të tjerë. Rreth 50 raste janë vlerësuar si të rënda, sepse bëhet fjalë për vjedhjen dhe keqpërdorimin e një sasie të madhe të të dhënave personale. BKA ka bastisur të dielën edhe vendbanimin e një dëshmitare, ndërkohë që janë marrë në pyetje edhe dëshmitarë të tjerë.
Për herë të parë të dhënat janë publikuar përmes rrjetit Twitter, në fund të dhjetorit. Por për shkak të ditëve të festave, ato kanë zgjuar vëmendjen e opinionit pas Vitit të Ri. Qeveria federale ka kërkuar përmirësimin e gjendjes tek autoritetet e sigurisë në internet. Muajt e ardhshëm do të punësohen më shumë forca në këto shërbime.
Fraksion.com
