Tërmet 6.4 ballë në juglindje të Iranit, mbi 700 të plagosur

Një tërmet me magnitudë 6.4 ballë në juglindje të Iranit ka lënë të paktën 700 persona të plagosur, dhe fatmirësisht asnjë viktimë. Irani ndodhet në një zonë me intensitet të lartë sizmik. Në vitin 2003, një tërmet i magnitudës 6.6 shkallë rrafshoi qytetin historik të Bamit në jug të vendit, duke lënë 26 mijë viktima.

Më shumë se 700 persona kanë mbetur të plagosur nga një tërmet me fuqi 6.4 ballë që tronditi Iranin në mbrëmjen e së dielës.

Instituti Iranian i Gjeofizikës njoftoi se deri tani nuk ka pasur viktima nga dhjetëra paslëkundjet e fuqishme, por vijojnë tentativat me skuadra speciale dhe qen të trajnuar për të shpëtuar personat që mund të jetë bllokuar nëpër godina.

Shefi i Departamentit të Emergjencës tha për televizionin kombëtar se pjesa më e madhe e personave që kanë përfunduar në spital u lënduan gjatë përpjekjeve për t’u larguar nga godinat dhe jo si shkak i dëmeve të termetit.

Lëkundjet rrëzuan linjat e tensionit të lartë dhe shkaktuan ndërprerje të energjisë ndërkohë që temperaturat arrinin në 8 Gradë Celsius gjatë natës.

Epiqendra e tërmetit raportohet se ishte 17 km nga qyteti jugperëndimor i Sarpol-e Zahabit.

Në të njëjtën zonë, një tjetër tërmet i fuqisë 7.3 ballë një vit më parë rezultoi me mbi 600 të vdekur dhe rreth 9 mijë të plagosur.

Irani ndodhet në një zonë me intensitet të lartë sizmik dhe përjeton të paktën një tërmet çdo ditë.

Tërmeti më vdekjeprurës për vendin ka qenë ai i vitit 1990 më magnitudë 7.4 ballë, i cili rezultoi në 40 mijë viktima dhe plagosi 300 mijë të tjerë, duke lënë rreth gjysme milionë banorë pa strehë.

Fraksion.com