Unaza, Basha ndërkombëtarëve: Jeni për pasarela
Kreu i PD, Lulzim Basha ka akuzuar organizatat ndërkombëtare në Shqipëri se nuk reagojnë për protestën e qytetarëve të zonës së Astirit dhe sipas tij po lejojnë vjedhjen e kryeministrit Edi Rama.
Përmes një deklarate për mediat, Basha kërkoi llogari se për çfarë ndodhen në Shqipëri organizatat ndërkombëtare kur nuk reagojnë. Sipas Bashes me heshtjen e tyre këto organizata bëhen bashkëfajtore.
“Kam një pyetje për organizatat ndërkombëtare që financohen me paratë e taksapaguesve të Europës dhe gjithë botës, të cilët lejojnë vjedhjen e hapur duke shkelur çdo standard të mirëqenë të mirëqeverisjes dhe të shtetit lidhor. Ku jeni? Për çfarë paguheni? Për çfarë pune jeni këtu? Për të bërë pasarela, për të ngrënë e të pirë në restorante të shtrenjta, për të na treguar se sa e mirë është cilësia e verës shqiptare? Ja ku e keni mirëqeverisjen, reformën në drejtësi. Një kryeministër harbut, hajdut, që shkel kushtetutë e shkel ligjin. Pse heshtni? Heshtja ju bën bashkëfajtor dhe të pabesueshëm në sytë e shqiptarëve”– tha Basha.
Basha tha se projekti i Unazës së Madhe është një projekt korruptiv, ndërsa sipas tij qytetarët që preken nga ky projekt i kanë banesat të gjithë në proces legalizimi dhe duhet të shpronësohen.
“Garë nuk ka pasur dhe çmimi i prokurimit është çmim rekord. Kur ke në plan të vjedhësh të erren sytë dhe nuk mund të shohësh ligj kur vjen puna tek pronat e qytetarëve. Propaganda e ndyrë dhe përçarëse e lolos së Edi Ramës, Erion Veliajt që i quan qytetarët shpellorë. Kjo është e drejta banesës dhe norma më e lartë. Edhe në ato raste kur je në proces legalizimi duhet të shpronësohesh thotë ligji, por ky ligj është ndryshuar për ti hapur rrugë hajdutërisë. Por këtë e ndalon Kushtetua. Nuk mund të marrë dikush dëmshpërblim dhe një tjetër të mos marrë. Një pjesë e banorëve janë dëmshpërblyer para se të nisë projekti, E drejta e fituar nuk mund të merret. Banorët e kanë fituar këtë të drejtë me ligjin e miratuar në vitin 2013.
Pretendimi se këtu po zbatohet ligji është një pretendim i paskrupullt. Flasin se këta njerëz janë zaptues. Secili prej tyre e ka blerë tokën dhe kane paguar taksat. Asnjë prej tyre nuk është zaptues. Edi Rama mashtron, pasi secili prej tyre është në proces legalizimi. Edi Rama është një hajdut i fiksuar pas vjedhjes. Ka shpikur PPP për të vjedhur shqiptarët. Ai është një njeri që mendon dhe jeton vetëm duke vjedhur. Ai vjedh gjithçka që prek.” tha Basha.
Fraksion.com
