Protesta e banorëve të ‘Unazës së Re’, “blindohet” Parlamenti (FOTO)

Banorët e “Astirit” prej më shumë se dy javësh kanë protestuar me thirrjet “Edi Rama o legen, shtëpitë tona nuk i shemb” dhe “Poshtë qeveria e korruptuar”, ndërsa kryeministri u është përgjigjur me deklarata dhe postime duke i kujtuar se nuk do të dëmshpërblehen zaptuesit e pronës publike.

Duke u gjendur përballë një muri të ngritur nga qeveria dhe ARRSH, banorët që kundërshtojnë shembjen e banesave të tyre që preken nga projekti i “Unazës së Madhe” të kryeqytetit, kanë vendosur që rezistencën t’ia tregojnë kryeministrit në Parlament.

Ashtu siç ishte parashikuar në orën 10:00, kur nisi seanca parlamentare, banorët e “Unazës së Re” nisën të grumbullohen pë të protestuar para Parlamentit.

Në ditën e 19 të protestës banorët do t’i kërkojnë qeverisë dëmshpërblim të drejtë për shtëpitë dhe bizneset e tyre, që janë ndërtuar në gjurmën e aksit nga “Pallati me Shigjeta” deri te sheshi “Shqiponja”.

Protestës para parlamentit  të banorëve të “Astirit” i janë bashkuar edhe qytetarë nga zona e “Uzinës së Traktorit”.

Në kuadër të kësaj proteste është mobilizuar edhe Policia e Shtetit, pasi 20 mjete të FNSH-së janë prezente para Parlamentit si dhe shumë forca kanë hyrë në oborrin e xhamisë së “Namazgjasë” për të qëndruar në gatishmëri në rast se situata mund të precipitojë.

Rreth Parlamentit është krijuar edhe një kordon policie me qëllim ruajtjen e institucionit. Gjithashtu situata do të monitorohet nga kreu i policisë së Tiranës dhe dy nëndrejtorët e këtij institucioni.

Ndërkohë, në Kuvend sot do të diskutohet edhe Buxheti 2019, si dhe dekreti i Presidentit Ilir Meta për ministrin e Brendshëm Sandër Lleshaj.

Fraksion.com