“Ferri” kalifornian: Vazhdojnë kërkimet për trupa

Autoritetet në Kaliforni vazhdojnë kërkimet për më shumë se 200 njerëz që rezultojnë të zhdukur, ndërsa zjarre të fuqishëm kanë përfshirë pjesën veriore dhe jugore të shtetit. Numri i të vdekurve ka arritur në 42. Sipas korrespondentit të Zërit të Amerikës Mike O’Sullivan, më shumë se 220 mijë persona janë detyruar të zhvendosen si pasojë e zjarrit që ka shdërruar në hi me mijëra shtëpi e biznese.

Vatra zjarresh të fuqishme vazhdojnë të djegin qytetin e Malibusë dhe qendra të tjera bregdetare pranë Los Anxhelosit. Mes ndërtesave të shkatërruara janë dhe shtëpitë e disa personaliteteve të famshëm amerikanë, mes tyre aktorja dhe këngëtarja Miley Cyrus.

Në veri të Sacramentos, pjesa dërrmuese e qytetit Paradise, me 27 mijë banorë është shkatërruar nga zjarri ndërkohë që autoritetet vazhdojnë detyrën e vështirë për gjetjen e trupave të të zhdukurve.

Të hënën, autoritetet e strukturave kundër zjarreve pranë Los Anxhelosit njoftuan për vatra të reja zjarri.

“Brenda një ore, patëm dy vatra të reja zjarri. Natyrisht ai godet shtëpi. Ne jemi ende në kushtet e një moti që e favorizon zjarrin ndaj dhe vatrat ekzistuese nuk janë shqetësimi ynë i vetëm“- Mark Lorenzen, shefi i departamentit të zjarrit në kontenë Ventura.

Banorët e zhvendosur po përpiq të marrin veten pas shkatërrimit.

“Lagje të tëra janë zhdukur. Shtëpia e vajzës sime e vjerrës së saj….çdo shtëpi është zhdukur. “- thotë Elizabeth Gorman.

Zjarrfikësit vazhdojnë kërkimet nën rrënojat e ndërtesave që digjen dhe raportojnë përparim në disa zona. Por sipas tyre dy vatra të mëdha zjarri janë ende jashtë kontrollit ndërsa parashikohet shtimi i erërave dhe një mot i thatë.

Fraksion.com