Veseli: Opozita të kërkojë falje, të bëhemi bashkë kundër Serbisë
Kryeparlamentari Kadri Veseli ka kërkuar nga opozita që të kërkojë falje publikisht për deklaratat që ka bërë ditëve të fundit për tradhti nga udhëheqësit e vendit.
Ai ka kërkuar që të bashkohen të gjitha partitë në mënyrë që të përballen me Serbinë, raporton Ekonomia Online.
Duke folur pas dështimit të seancës së jashtëzakonshme të thirrur me nënshkrimet e 51 deputetëve të opozitës për mungesë kuorumi, Veseli ka thënë se situata e këtyre ditëve tregon më së miri se politikat destruktive nuk prodhojnë asgjë.
“Përveç konfliktit i cili bartet edhe te qytetarët tanë. Kjo situatë e sotme tregon se nuk është mirë me folë fjalë të mëdha, e fjalë të rënda për të treguar fuqinë ndaj njëri-tjetrit. Por duhet të ulemi bashkërisht e të diskutojmë për çështjet për të cilat kanë të bëjnë me shqetësimin e qytetarëve”, ka thënë Veseli.
“Opozita duhet të kërkojë falje publikisht për akuzat e paqena që ka bërë, për fjalët e rënda. Diskursi i tillë publik nuk është në traditën tonë, nuk e përballon ambienti jonë”, ka thënë Veseli.
“Pa lejen tonë, këmba e Vuçiqit nuk do të shkelte në Kosovë”
Kreu i Kuvendit të Kosovës foli edhe për vizitën e paralajmëruar në Kosovë nga presidenti i Serbisë Aleksandër Vuçiq.
Ai tha se nëse institucionet e Kosovës vendosin që Vuçiqi mos të vijë në Kosovë, këmba e tij nuk të shkelte këtu.
“Ajo çfarë tani jemi duke menduar është vetëm për situatën e bashkëqytetarëve tanë e cila ka të bëjë me pozicionin e shtetit tonë të pavarur dhe sovran, me liberalizmin e vizave me partnerët tanë, përndryshe po të mos ishte kjo situatë, le ta din edhe Vuçiqi, kamën nuk e kish shkel në Kosovë. Le ta provojë pa leje nëse do të mundet e din edhe për atë tjetrin qysh ka shku”, tha ndër tjerash Veseli, duke aluduar në arrestimin e Marko Gjuriqit nga njësitet speciale, kur ai kishte hyrë pa leje, para disa muajsh.
Fraksion.com