Shqiptaro-amerikanët, letër presidentit Trump: Shqetësim për marrëdhëniet e SHBA me aleatët
Disa përfaqësues të shqiptarëve të Amerikës i shprehën Presidentit Donald Trump shqetësimin e thellë rreth një keqësimi të mundshëm të marrëdhënieve mes Shteteve të Bashkuara dhe aleatëve evropianë.
E nënshkruar nga anëtari i Këshillit të Qytetit të Nju Jorkut, Mark Gjonaj dhe përfaqësues të 10 organizatave shqiptaro-amerikane, letra i referohet komenteve të bëra në një intervistë të Trump me komentatorin e kanalit Fox News, Carson Tucker, ku Presidenti vuri në pikëpyetje nëse SHBA do t’i përmbaheshin nenit 5 të Traktatit të NATO-s për mbrojtjen e ndërsjellë dhe ku u përmendën Mali i Zi dhe Shqipëria.
Në letër thuhet se përgjigja e Trump në atë intervistë flet për një moskuptim thelbësor të historisë së rajonit dhe të rolit të paçmueshëm të Amerikës në ruajtjen e paqes.
“Nëse flet me një shqiptar, në Amerikë apo jashtë saj, thuhet në letër, do të vësh re një ndjenjë të thellë dashurie dhe respekti për Shtetet e Bashkuara dhe kuptimin që ka patur roli i tyre si udhëheqëese e botës së lirë.”
Marrëveshja për mbrojtjen kolektive, thuhet në letër, ka bërë që bota të mos gjendet në prag të një lufte tjetër botërore.
Në letër shprehet keqadhje që komentet për NATO-n dhe për njerëzit “shumë agresivë” të Malit të Zi e vënë në pikëpyetje udhëheqjen morale të Amerikës, në një kohë kur, siç thuhet aty, bota ka nevojë më shumë se kurrë për të.
Çështja e komenteve të Trump për Malin e Zi u shfaq përsëri të mërkurën gjatë seancës së Komisionit të Senatit për Marrëdhëniet me Jashtë me Sekretarin e Shtetit Mike Pompeo, i cili nuk u vuri rëndësi komenteve të shprehura në intervistë dhe tha se politika e Presidentit Trump ka qenë e qartë jashtë çdo dyshimi.
Biseda Carlson-Trump në Fox News më 17 korrik 2018
Carlson: Përse duhet që djali im të shkojë në Mal të Zi për ta mbrojtur atë nga sulmi? Përse të jetë kështu?
Trump: E kuptoj çfarë po thoni. Unë kam shtruar të njëjtën pyetje. Mali i Zi është një vend i vogël me njerëz shumë të fortë.
Carlson: Po. Unë nuk jam kundër Malit të Zi, ose Shqipërisë.
Trump: Jo, por meqë ra fjala, ata janë njerëz shumë të fortë. Ata kanë njerëz shumë agresivë. Ata mund të bëhen agresivë dhe… urime jemi pastaj në Luftën e Tretë Botërore. Unë e kuptoj këtë, por kështu janë ndërtuar gjërat.
Fraksion.com
