Tsipras për detin: Po përpiqemi të zgjidhim problemet me Shqipërinë

Nga Samiti i Ballkanit Perëndimor që po zhvillohet në Londër, është prononcuar për mediatc kryeministri i Greqisë, Aleksis Tsipras.

Ai ka deklaruar se ka përpjekje serioze për zgjidhjen e problemeve mes Greqisë dhe Shqipërisë, në një kohë kur dy vendet po negociojnë çështjen e kufirit detar. Mediat greke shkruajnë se teksa ka prekur sfidat e Ballkanit dhe kontinentit të vjetër, kryeministri grek tha se gjërat po ndryshojnë.

“Gjërat po ndryshojnë tani. Me Marrëveshjen e Prespës, Marrëveshja Bullgari- FYROM (Maqedoni), me përpjekjet për të zgjidhur çështjet midis Greqisë dhe Shqipërisë, me presidencën e suksesshme bullgare të BE dhe ringjalljen e Axhendës së Selanikut për zgjerimin e BE”, shtoi kreu i qeverisë greke.

Duke kujtuar se në 2014-ën, Presidenti i Komisionit Europian Jean-Claude Juncker njoftoi ngrirjen e procesit të zgjerimit dhe sot jemi në një stad ku për Shqipërinë dhe Maqedoninë përcaktohet çelja e negociatave në qershor 2019, Tsipras tha se “periudha që kemi kaluar ishte jashtëzakonisht e vështirë për Ballkanin”.

“Evropa përjetoi përtej krizës ekonomike, krizën më të keqe të refugjatëve pas luftës, e cila u përqendrua në rajon… Ne kemi përjetuar një përpjekje të tmerrshme të grushtit të shtetit në Turqi, si dhe krizat në Shqipëri dhe Maqedoni”, tha kryeministri helen.

Fraksion.com