Presidenti Trump i dërgoi letra tetë anëtarëve të NATO-s: Nuk keni përmbushur angazhimet

Donald Trump i bën thirrje Gjermanisë dhe aleatëve të BE për shpenzimet e mbrojtjes së NATO-s përpara takimit të nivelit të lartë.

Kryeministri i Belgjikës ishte “i pakënaqur” pasi mori një letër nga Trump lidhur me qëndrimin ndaj premtimeve të NATO-s. Me më pak se dy javë deri në samitin e aleancës në Bruksel, Trump tha gjithashtu se Gjermania duhet të shpenzojë më shumë.

Presidenti i SHBA Donald Trump i dërgoi letra tetë anëtarëve të NATO-s duke i këshilluar ata për mos përmbushjen e angazhimeve të tyre të shpenzimeve, tha të premten kryeministri belg Charles Michel.

“Nuk jam shumë i impresionuar nga kjo lloj letre,” u tha Michel gazetarëve në margjinat e një samiti të BE në Bruksel.

“Belgjika ka ndërprerë rënien sistematike të shpenzimeve të mbrojtjes dhe merr pjesë në shumë operacione ushtarake”, shtoi ai.

Gjermania, Italia, Spanja, Portugalia, Luksemburgu, Norvegjia dhe Hollanda gjithashtu morën letra individuale të nënshkruara personalisht nga udhëheqësi amerikan,  i tha një burim diplomatik agjensisë së lajmeve AFP.

Trump iu drejtua Berlinit dhe aleatëve të tjerë evropianë lidhur me shpenzimet e NATO-s në komentet ndaj gazetarëve të premten.

“Gjermania duhet të shpenzojë më shumë para, Spanja, Franca, nuk është e drejtë se çfarë kanë bërë Shtetet e Bashkuara”, u tha Trump gazetarëve në bordin e Air Force One.

Anëtarët e NATO-s kanë rënë dakord të kalojnë 2 për qind të prodhimit ekonomik në mbrojtje çdo vit deri në vitin 2024, por Gjermania dhe Spanja janë midis vendeve që nuk pritet të përmbushin objektivin.

Franca planifikon të rrisë shpenzimet e mbrojtjes me më shumë se një të tretën midis 2017 dhe 2025, me qëllim të arritjes së qëllimit të NATO-s.

Ministri gjerman i Mbrojtjes Ursula von der Leyen, megjithatë, tha javën e kaluar pas një takimi me homologun e saj amerikan, Jim Mattis, se SHBA ishte e kënaqur me shpenzimet e planifikuara të mbrojtjes të Gjermanisë.

 

Samiti i NATO-s në horizont

Me më pak se dy javë të mbetura  për të shkuar deri në samitin e  NATO-s në Bruksel, letrat me siguri do të rrisin tensionet midis aleatëve amerikanë dhe atyre evropianë që tashmë janë tensionuar nga përballja me G7 në Kanada.

Trump ka kritikuar në mënyrë të përsëritur aleatët në Evropë për të mos shpenzuar mjaftueshëm për mbrojtjen. Ai ka qenë veçanërisht kritik ndaj anëtarëve të NATO-s të cilët nuk kanë përmbushur angazhimin e  vitit 2014 për të shpenzuar 2 përqind të PBB-së së tyre kombëtare në mbrojtje deri më 2024.

Aktualisht, vetëm Britania e Madhe, Greqia dhe Estonia kanë përmbushur synimin e shpenzimeve.

NATO shpreson që katër vende të tjera – Rumania, Polonia, Letonia dhe Lituania – do të përmbushin synimin nga samiti, i cili do të zhvillohet nga 11-12 korrik.

 

Fraksion.com