Kupa e Botës: Fitorja e Francës, mes vështirësive dhe mbrojtjes

Franca mes vështirësive dhe mbrojtjes së hekurt australiane ia ka dalë që të triumfojë në këtë takim të vlefshëm të Grupit C me rezultatin 2-1. “Gjelat” zhvilluan një lojë mjaft tërheqëse, teksa krijuan shumë aksione dhe presing të vazhdueshëm, por nuk kanë qenë shumë premtues në finalizimet e aksioneve.

Franca ka fituar 2-1 ndaj Australisë në një ndeshje ku për të dy golat e “Gjelave” u desh ndërhyrja e teknologjisë.

Pas një pjese të parë 0-0, Griezmann fitoi një penallti që arbitri fillimisht nuk e akordoi. Më pas, e pa disa herë në monitor derisa vendosi që ndërhyrja e mbrojtësit australian duhej ndëshkuar me 11-metërsh dhe karton të verdhë.

Griezmann kaloi në avantazh Francën pasi shndërroi në gol penalltinë në minutën e 58. Por vetëm 4 minuta më vonë Umtiti i dhuroi penallti Australisë. Nga pika e bardhë barazoi rezultatin kapiteni Jedinak.

Vetëm klasi i Pogba i bashkuar me fatin bëri që Franca të shënonte golin e dytë, kur në minutën e 81 parabola e mesfushorit të Manchester United u përplas në traversë dhe kaloi për fare pak vijën fatale.

Edhe këtu ishte teknologjia që akordoi golin për francezët, që marrin tre pikë të vlefshme.

Fraksion.com