Argjentina tradhtohet nga Messi. Vetëm 1-1 me Islandën

Argjentina nuk shkoi dot më shumë sesa barazimi 1-1 ndaj Islandës. Leo Messi, mbi të cilin ishin përqendruar sytë e të gjithë tifozëve të futbollit, përveçse zhgënjeu me lojën e tij, humbi edhe një 11-metërsh në pjesën e dytë.

Nëse te Barcelona shkëlqen prej vitesh, Lionel Messi nuk po arrin të bëjë të njëjtën gjë te Argjentina, që nisi aventurën e saj në Kupën e Botës “Rusi 2018”, me një barazim ndaj Islandës.

Argjentina e nisi me mjaft entuziazëm takimin dhe gjeti golin e avantazhit në minutën e 19, me anë të sulmuesit Sergio Aguero, që pasi u shërbye në zonë nga Rojo, u rrotullua bukur dhe gjeti trekëndëshin e portës së kundërshtarëve.

Islanda reagoi menjëherë dhe arriti të rikthejë baraspeshën pas vetëm 4 minutash, pasi në të 23-tën ishte Finnbogason, që pas një rrëmuje në zonë, gjuajti dhe dërgoi topin në rrjetë.

Me barazimin 1-1 përfundoi pjesa e parë, ndërsa në 45-minutat e dyta Argjentina e shtoi presionin, në kërkim të golit të fitores. Rastin më të mirë e pati Lionel Messi, në minutën e 64-t, por ylli i Barcelonës humbi penalltinë përballë portierit islandez, Halldorsson.

Kapiteni i Argjentinës tentoi edhe në disa raste të tjera, që të gjejë golin, por nuk arriti të gjejë rrjetën e portës islandeze, duke bërë që sfida të përfundojë në barazim.

Argjentina zotëroi topin rreth 80% të kohës, por mbrojtja islandeze arriti të rezistonte deri në fund, duke marrë një pikë të vlefshme.

Argjentina dhe Islanda janë në grup së bashku me Kroacinë dhe Nigerinë.

Fraksion.com