Tenderët: Kush shpallet fitues por nuk realizon detyrimin, refuzohet

Agjencia e Prokurimit Publik ka ndryshuar udhëzimin e saj të janarit 2018 “Mbi përdorimin e procedurës së prokurimit me vlerë të vogël dhe zhvillimin e saj me mjete elektronike” duke kërkuar më shumë përgjegjshmëri në mënyrën sesi bëhen ofertat. Dy janë pikat kyçe të këtij udhëzimi të ri ku e para lidhet me objektin e aktivitetit që kanë operatorët ekonomikë që hyjnë në tenderë që duhet të jetë e njëjtë me atë për të cilën kërkohet shërbimi apo malli. Nëse aktiviteti është i ndryshëm atëherë oferta do të refuzohet.

“Anëtarët e komisionit të prokurimit me vlerë të vogël pas hapjes së ofertave në orën dhe datën e caktuar, sipas shpjegimeve të dhëna në manualin teknik, fillimisht do të verifikojnë fushën e veprimtarisë së të gjithë ofertuesve pjesëmarrës në faqen zyrtare të Qendrës Kombëtare te Biznesit.

Nëse pas verifikimeve rezulton se, ndonjë nga operatorët ekonomik nuk ka si objekt të veprimtarisë së tyre objektin e prokurimit, oferta e tyre do të refuzohet automatikisht nga komisioni i prokurimit me vlerë të vogël dhe nuk do të përfshihet në klasifikimin e ofertave.

Procesi i refuzimit të ofertave, për shkak të mospasjes në objektin e ushtrimit të veprimtarisë objektin e prokurimit, do të reflektohet në Sistemin e Prokurimit Elektronik,” thuhet në udhëzimin e APP.

Ndryshimi i dytë lidhet me rritjen e përgjegjshmërisë së operatorëve për të çuar deri në fund procesin për të cilën kanë hyrë në garë. Nëse një operator është shpallur fitues por nuk është paraqitur për të vijuar me hapat e tjera atëherë ai do të refuzohet automatikisht nëse oferton në procedurën e radhës të shpallur nga institucioni.

“Anëtarët e komisionit të prokurimit me vlerë të vogël do të refuzojnë automatikisht ofertën e paraqitur nga një operator ekonomik, i cili në një procedurë të mëparshme prokurimi me vlerë të vogël të zhvilluar nga ky autoritet gjatë këtij viti, nuk është paraqitur brenda afatit kohor të përcaktuar në ftesën për ofertë për të realizuar objektin e prokurimit, pavarësisht faktit se mund të ketë njoftuar autoritetin kontraktor, por nuk ka dhënë arsyet që kanë shkaktuar pamundësinë e realizimit të objektit të prokurimit. Ofertat e refuzuara nuk do të përfshihen në klasifikimin e ofertave” thuhet në udhëzim.

Arsyet pse u bënë ndryshimet

Agjencia e Prokurimit Publik shoqëroi nxjerrjen e udhëzimit të ndryshuar me një njoftim ku sqaronte arsyet se pse ka një vëmendje të shtuar ndaj blerjeve me vlerë të vogël. Sipas këtij institucioni është vënë re se nga ana e operatorëve ekonomikë në shumë raste ofertohet në referencë të fondit limit të vënë nga institucioni dhe jo pas një analizë të mirëfilltë të asaj që kërkohet.

Kjo bën që në momentin që janë shpallur fitues operatorët të vlerësojnë se oferta e tyre nuk përputhet me plotësimin deri të fund të detyrimeve ndaj institucionit ndaj vendosin që të tërhiqen dhe në shumë raste duke mos dhënë arsyen e këtij vendimi.

“Në këtë kuadër, me qëllim shmangien e ofertimit të papërgjegjshëm të operatoreve ekonomikë, të cilët nuk përllogarisin ofertat e tyre në bazë të nevojave që autoritetet kontraktore kanë për mallra/punë/sherbime, bazuar edhe në parashikimet e nenit 40 te VKM nr.914, date 29.12.2014 “Për miratimin e rregullave të prokurimit publik”, të ndryshuar, ku fondi limit nuk është element i urdhrit të prokurimit, u vlerësua që operatorët ekonomikë të mos njihen paraprakisht me fondin e përllogaritur nga autoriteti kontraktor por vetëm me objektin e prokurimit dhe sasinë e kërkuar nga autoriteti” vlerëson APP.

Prokurimit me vlerë të vogël I nënshtrohen të gjithë ato mallra/punë/shërbime vlera e të cilave përgjatë një viti kalendarik është nga 100 mijë deri në 800 mijë lekë./Monitor

Fraksion.com