PBB-ja shqiptare: 64% zënë pagat për punonjësit

31 Maj, 2018 admin

Më shumë se gjysma e Prodhimit të Brendshëm Bruto, respektivisht 64% e tij rishpërndahet në formën e pagave dhe kompensimeve për punonjësit. Ndërsa pjesa tjetër llogaritet si shpenzim për taksa dhe ajo që mbetet janë fitimet që ekonomia ka gjeneruar në tërësi, shkruan Monitor.

INSTAT ka publikuar së fundmi treguesit e shpërndarjes së PBB-së, duke përshtatur raportimet kombëtare me standardet (ESA 2010).

Produkti i Brendshëm Bruto me çmimet e tregut shpërndahet sipas elementeve:

1-Punë (kompensimi i punonjësve)

2-Taksa (diferenca e taksave dhe subvencioneve mbi prodhimin) dhe

3-Fitimi operativ bruto

Sipas INSTAT, kompensimi i punonjësve zë pjesën kryesore të vlerës së shtuar bruto në ekonomi me 64%.

Gjatë periudhës 2013-2015, vihet re trend në rritje i kompensimit të punonjësve, duke ndjekur të njëjtin trend me vlerën e shtuar bruto, për ekonominë gjithsej.

Nga ana tjetër, si rezultat i rritjes më të lartë të kompensimit të punonjësve, fitimi operativ bruto në raport me vlerën e shtuar ka pësuar rënie në vitin 2015, krahasuar me 2014 me 6 pikë përqindje.

Sektori Jo-Financiar dhe Sektori i Familjeve janë dy sektorët më të mëdhenj në ekonomi, rrjedhimisht dhe vlera e kompensimit të punonjësve ndahet ndërmjet këtyre dy sektorëve.

Sektori Financiar zë rreth 2% të kompensimit të punonjësve dhe përbëhet nga një numër më i vogël njësish që operojnë në këtë sektor. Sektori që zë pjesën më të vogël është ai i institucioneve Jofitimprurëse në shërbim të familjeve me 1%.

You May Also Like