Methju Nimic për emrin: Akoma nuk ka zgjidhje përfundimtare; Të dyja palët ta gjejnë

Akoma nuk ka zgjidhje përfundimtare për kontestin për emrin midis Maqedonisë dhe Greqisë, por të dyja palët janë të vendosura të vazhdojnë të punojnë derisa nuk gjendet zgjidhje, deklaroi shkurt sot në Nju-Jork ndërmjetësi i Kombeve të Bashkuara në negociatat midis dy vendeve Methju Nimic, pas bisedimeve me shefat e diplomacive, Nikolla Dimitrov dhe Nikos Koxias.

“Siç e dini patëm takim dje dhe sot, biseduam për një ditë e gjysmë. Mund të them se kemi punuar shumë. Çështjet janë të definuara mirë, të saktësuara. Mund të them se këto ishin negociata në të cilat kemi punuar shumë”, tha Nimic, pas përfundimit të takimit me dy ministrat.

Ndërmjetësi theksoi se Dimitrov dhe Koxias shkojnë për në Bruksel, ku do të vazhdojë dialogu dhe shtoi se edhe pse akoma nuk ka zgjidhje përfundimtare të dyja palët janë të gatshme me angazhim të punojnë që ta gjejnë.

“Negociatat janë intensifikuar dukshëm, siç thanë të dyja palët kanë pozita të rëndësishme, në pyetje janë interesat kombëtare. Të dyja palët e njohin rëndësinë e arritjes së zgjidhjeve dhe janë të vendosura ta bëjnë atë”, shtoi Nimic.

Dimitrov dhe Koxias dje pothuajse gjashtë orë biseduan me ndërmjetësin Nimic, ndërsa sot negociatat zgjatën rreth dy orë.

Dy ministrat dje në prag të raundit të ri të bisedimeve për emrin patën takime të posaçme me sekretarin e përgjithshëm të KB-së, Antonio Guteresh ku u bisedua për ngjarjet e fundit nga bisedimet për tejkalimin e dallimit rreth emrit që po zhvillohen nën patronatin e Organizatës botërore.

“Me vizion dhe lidership të të dyja palëve kemi mundësi historike të mbyllim një kontest historik prej shumë dekadash”, porositi Dimitrov pas takimit me Guteresh.

Ministri grek i Punëve të Jashtme Koxias, ndërkaq, pas takimit me sekretarin e përgjithshëm të KB-së, në prag të raundit të ri të sotëm të bisedimeve me kolegun e tij maqedonas dhe ndërmjetësin Nimic, deklaroi se pala tjetër duhet të tregojë pragmatizëm dhe realizëm për të gjetur zgjidhje.

I pyetur nëse nga Nimic pret të parashtrojë propozim sintetik nga e tërë ajo që e parashtruan të dyja palët, Koxias thotë se Greqia e ka bërë atë, por mbetet e hapur çështja me emrin.

“Nga Nimic e presim maturinë e tij gjatë negociatave”, thotë shefi i diplomacisë greke dhe sqaron se negociatat janë ndarë në dy pjesë, ato mes ministrave të jashtëm të cilët bisedojnë për çështje qendrore politike dhe mes grupeve teknike.

Kryeministri grek Aleksis Cipras, nga ana tjetër, sot nga Selaniku porositi se Greqia në negociata nuk shkon për të dhënë diçka.

“Nuk shkojmë ta japim emrin Maqedoni, siç pohojnë disa, shkojmë ta marrim mbrapa diçka që është dhënë para 70 vjetëve”, tha Cipras.

Cipras konsideron se emri pa përcaktim “i referohet botës antike greke dhe trashëgimisë së madhe kulturore të Maqedonisë greke”, ndërsa  në bisedimet Athina synon që këtë ta kthejë mbrapa, diçka që sipas Ciprasit  “nuk është e lehtë”.

Kryeministri grek shtoi se është koha që dy vendet të ekzistojnë bashkë, të bashkëpunojnë dhe të jetojnë në paqe në dobi të gjithë botës.

Takimi në Nju-Jork pason pas bisedimeve të kryeministrave të të dy vendeve Zoran Zaev dhe Aleksis Cipras në margjina të Samitit BE-Ballkani Perëndimor në Sofje në të cilat opsioni “Republika e Maqedonisë së Ilindenit” ishte ndarë si më i pranueshmi.

Pala e Maqedonisë para takimit në Nju-Jork deklaroi se mbetet në qëndrimin se ai është propozim i mirë për zgjidhje përfundimtare, përderisa pala greke e hodhi poshtë propozimin dhe theksoi se negociojnë në bazë të katër emrave nga pakoja e propozimeve të Nimicit./kohamk

 

Fraksion.com