AktualitetNATO/BETë fundit

Samiti i Sofjes, gazeta El Confidencial: Rajoy e humbi “betejën e Kosovës”

Spanja nuk ia ka dalë në përpjekjet e saj për ta bërë që Kosova të duket më pak se shtet në Samitin e përbashkët të BE-së me vendet e Ballkanit Perëndimor, shkruan gazeta spanjolle El Confidencial në një artikull që titullohet: Rajoy e humbi luftën në Ballkan

Kryeministri Mariano Rajoy do të udhëtojë drejt Sofjes vetëm për takime me liderë të ndryshëm në mbrëmje por nuk do të jetë prezent, pasi kërkesa e tij që Kosova të mos prezantohej si shtet hasi në kundërshti të fortë nga vendet e tjera të BE-së.

El Confidencial shkruan se Rajoy nuk arriti të detyronte partnerët e tij në EU t’i bashkohen në bojkotimin e samitit që do të mbahet më 17 maj në Bullgari.

Kështu Kosova do të jetë pjesë e “gjashtëshes së Ballkanit Perëndimor” në samit, së bashku me Serbinë, Bosnje e Hercegovinën, Malin e Zi, Maqedoninë e Shqipërinë.
Burime të El Confidencial në qeverinë spanjolle thonë se kryeministri do të qëndrojë vetëm një ditë në Bullgari për takime me liderë evropianë.

“Kosova është pjesë e gjashtëshes, dhe shumë anëtarë të BE-së konsiderojnë se është shumë me rëndësi që aty të jetë i pranishëm i gjithë regjioni”, ka thënë burimi i kësaj gazete.

Për BE-në, Ballkani Perëndimor është shumë i rëndësishëm.
“Jo vetëm për shkak të lidhjes ndërmjet BE’së dhe lindjes, por edhe për shkak të rritjes së ndikimit rus, rrezikut të destabilizimit në regjionin me tensione të vazhdueshme”, shkruan El Confidencial.

Ndër anëtaret e BE-së, edhe Greqia, Rumania, Qipro e Sllovakia nuk e ka njohur Kosovën, por këto do të marrin pjesë në Samit.

“Dhurata ngushëlluese” për Spanjën dhe vendet që nuk e kanë njohur Kosovën është se nuk do të ketë “deklaratë të përbashkët të BE-së dhe gjashtëshes së Ballkanit Perëndimor”, e cila do të thoshte që edhe Kosova të vërë nënshkrimin e saj në dokument. Në vend të kësaj, është arritur marrëveshje që të ketë deklaratë të BE-së me të cilën pajtohen vendet e Ballkanit, por këto nuk do ta nënshkruajnë.

“Shumë partnerë evropianë nuk janë të kënaqur me këtë zgjidhje, por e kanë pranuar sepse e kuptojnë situatën e Spanjës”, shkruan në tekstin e El  Confidencial.
“Spanja në këtë lëvizje ka investuar shumë kapital politik, e që në fakt nuk e tejkaloi simbolikën, por nuk arriti atë synohej: që Kosova të mos trajtohej si shtet gjatë samitit. Shtrohet pyetja, a ia vlejti, duke i parë rezultatet”, përfundon shkrimi i El Confidencial./Express