Pompeo përballë Komisionit të Senatit për Marrëdhëniet me Jashtë
Kandidati i Presidentit Donald Trump për postin e Sekretarit të Shtetit, Mike Pompeo, po përballet me kundërshtime të forta në Komisionin e Senatit për Marrëdhëniet me Jashtë, i cili mund të mos t’i ketë votat e mjaftueshme për t’i rekomanduar konfirmimin e tij gjithë Senatit, pasi të gjithë demokratët dhe një republikan kanë thënë se do votojnë kundër.
Gjithsesi Senati pritet ta marrë në shqyrtim kandidaturën e zotit Pompeo nga fundi i javës. Por votimi i pritshëm kundër sot nga Komisioni – diçka që ndodh rrallë – edhe pas vizitës së zotit Pompeo në Korenë e Veriut, do të ishte hera e parë prej shumë vjetësh që një kandidat për një post të lartë në Kabinet, nuk do të merrte miratimin e Komisionit.
Kreu i Komisionit, senatori republikan Bob Corker fajësoi politikën partiake për kundërshtimin ndaj kandidaturës së zotit Pompeo, drejtori aktual i CIA-s, duke thënë se ai është po aq i kualifikuar sa kandidatë të mëparshëm, si Hillary Clinton apo John Kerry, të cilën u mbështetën me shumicë dërrmuese.
Presidenti Donald Trump i sulmoi demokratët e opozitës duke i quajtur “pengues” që nuk votojnë në favor të zotit Pompeo. Zoti Trump shkruante në Twitter: “Demokratët nuk do miratojnë qindra kandidatura njerëzish të mire. Po arrijnë në kufijtë e afatit të procesit për të gjithë. Nuk ka ndodhur kurrë më parë. Na duhen më shumë republikanë”.
Zëdhënësja e Shtëpisë së Bardhë, Sarah Huckabee Sanders u bëri thirrje demokratëve që ta mbështesin kandidaturën, duke thënë se “demokratët duhet të vendosin nëse e duan këtë vend, më shumë sesa urrejnë presidentin”.
Konfirmimi i zotit Pompeo para gjithë Senatit varet tani nga vetëm një numër i vogël senatorësh, votat e të cilëve do të përcaktojnë nëse ai do të bëhet kryediplomati i vendit, pasi zoti Trump shkarkoi Rex Tillersonin, muajin e kaluar.
