Shkodër, 11 protestuesit në gjykatë, qytetarët dhe PD protestë, hidhen kapsolla dhe tymuese

11 kuksianët e arrestuar për protestat e dhunshme në “Rrugën e Kombit” tre javë më parë kanë dalë para Gjykatën e Apelit për rivlerësim të masës së sigurisë. Seanca ka nisur në orën 11:00, ndërsa të pranishëm janë edhe deputetët e grupit të PD. Trupa gjykuese përbëhet nga; Astrit Kalaja, Hajrie Mulmataj dhe Vojsava Osmanaj. Prokurorë janë Elvin Gogaj dhe Brahim Ndragjoshi, ndërsa kërkojnë që 11 protestuesit të qëndrojnë në burg.

Jashtë ambienteve të gjykatës së Apelit në Shkodër po zhvillohet një protestë nga qytetarët e Kukësit në mbështetje të 11 të arrestuarve. Protestuesit kanë hedhur tymuese dhe kapsolla, ndërsa mbajnë në duar pankarta të ndryshme me mbishkrimet “Lironi vëllezërit tanë”, “Lironi protestuesit, arrestoni Tahirin”.

Ashtu sikur kishte paralajmëruar protestës i është bashkuar edhe grupi i PD, si në seancën e parë në Gjykatën e Tiranës. Për të parandaluar ndonjë përplasje, policia ka vendosur të qëndrojë në gatishmëri me 200 efektivë policie, ndërkohë që është bllokuar aksi që të dërgon në Gjykatën e Apelit në Shkodër. Protestuesit u arrestuan tre javë më parë, pasi kundërshtuan taksën në Rrugën e Kombit duke thyer dhe djegur sportelet e koncesionarit.