Beogradi dhe Prishtina, në fazë të re dialogu
Takimi i parë për këtë vit mes presidentit të Kosovës, Hashim Thaçi, dhe atij serb, Aleksandar Vuçiç, me ndërmjetësimin e Përfaqësueses së Lartë të Bashkimit Europian, Federica Mogherin u zhvillua të premten mbrëma më 23 mars 2018, në Bruksel.
Zëdhënësja e Mogherinit, Maja Koçijançiç publikoi disa foto nga nisja e takimeve. Fillimisht, Përfaqësuesja e Lartë e BE-së Mogherini u takua veçmas me presidentin e Serbisë, Aleksandar Vuçiç dhe atë të Kosovës, Hashim Thaçi.
Pas darkës që patën mes tyre, u publikua edhe një deklaratë mbi zhvillimet.
Në takimin e ndërmjetësuar nga Mogherini, dy presidentët Thaçi e Vuçiç biseduan mbi kuadrin e fazës së re të dialogut mes Beogradit dhe Prishtinës, përgatitjet për një marrëveshje gjithëpërfshirëse të normalizimit të marrëdhënieve mes dy vendeve.
Ata rishikuan të gjithë progresin e bërë me implementimin e marrëveshjeve të mëparshme, sigurisht edhe nën lupën e punimeve të fundit në Bruksel.
Përfaqësuesja e Lartë e BE-së nënvizoi rëndësinë që blloku europian i jep implementimit të plotë të të gjitha marrëveshjeve ekzistuese dhe theksoi në veçanti nevojën urgjente për ngritjen e Asociacionit të Komunave me shumicë serbe, vijimin e marrëveshjes së energjisë dhe procedimin e mëtejshëm të kompletimit të paktit mbi urën e Ibrit në Mitrovicë.
Mogherini mirëpriti gjithashtu angazhimet e vazhdueshme të të dy presidentëve për normalizimin e marrëdhënieve mes Kosovës dhe Serbisë, e kujtoi se progresi i bërë nga të dyja palët mbi axhendat e tyre të integrimit është vendosmërisht i lidhur me progresin në këtë proces dialogu.
